Chaque semaine, retrouvez les histoires de Christian Carlens, dans votre hebdomadaire gratuit. Un exemple ci dessous ;

D’siré éyé Marguerite.

Le r’tour  de vacances.

D’siré : Allez Margot monte in l’autobus, les vacances in Espagne c’est tout, maitnant de su  pressé de rintrer à m’maison  pour mi r’trouver mes lapègnes…mes coulons…infègne mes p’tites biètes…mais monte Margot !

Margot : Mais de n’sais nié fée n’grande insganbée, tu n’vois nié que les escaliers sont hauts !

D’siré : Mais c’est de t’faute t’as mis n’cotte trop stoite…attind de va saquié n’miette su l’finte de t’cotte lauçi pa’dié.  (on inttind …crac)

Margot : Na, t’as descléffé m’cotte , d’su propre tout maitnant…au lieu de m’printe à bras éyé em’mette in l’autobus.

D’siré : C’est ça éyé d’arai ée r’tour de règne pour mi rintrer in Belgique .Allez assit –te…i n’a personne qui va vire que t’cotte est descléffée !

Margot : Elle n’est nié trop descléffée…respond in D’siré !

D’siré : Non…ell’finte est de qu’a tes règnes…çà n’ fée rié t’as n’combinaison !

Margot : Non de n’d’ai nié mis pasque i  fée trop caud…qu’ée malheur.

D’siré : Na, nous stons d’allé…qu’ée n’idée que t’as oyus de v’nie in Espagne in autocar…tu vas cô awoi tes g’vies gonflées …tu vas cô awoi coulà comme deux salamis tel’mint que…

Margot : Chut D’siré…les dgeins ascoutent-te tes biestries…monh…

D’siré : Qu’est c’ qu’il a ?

Margot : I m’faut fée pipi.

D’siré : D’jà mais on vié de démarrer qu’ée n’ouvrâge…attind d’arriver à nou maison !

Margot : A nou maison …mais il a 1400 kms t’as invie de m’fée morie !

D’siré : Mais tu n’péx nié d’aller ainsi avé t’ cotte toute déscléffée…on va rire de ti éyé n’mi pa l’ même occasion.

Margot : Donnes me l’sac qu’d’vin l’filet.

D’siré : Qu’ée filet ?

Margot : Mais l’porte bagages qu’est s’t’au d’zeur de t’tiète lauçi…

D’siré : A bon…mais pouque fée ?

Margot : De va printe ée grand sumègne que de va mette à l’intour de mi…ainsi de va d’aller au cabinet.

D’siré : Que l’ sac est p’sant…hop là (l’sac gliche des mègnes D’siré éyé i roule in l’allée…l’bus freine éyé l’sac gliche de qu’au chauffeur)

Margot : C’est malègne…vas t’in quéer l’sac.

D’siré : Mais oui tu n’as nié voulu t’mette de l’ée l’ferniète…l’ièves-te pour mi passer

Margot : Mais de n’péx nié me r’lever d’ai m’cotte déscléffée !

D’siré : Tu m’in fée des siennes Marguerite…

Margot : Mais qu’t’es lourd…allez donne et’ bèche de va l’mette à l’intour de mi éyé de m’in va à l’cour …pindant s’tant là va t’in qu’éer l’sac.

(Marguerite s’met s’tampée…l’car accélère éyé l’sac r’vièt su Margot qui prind ses gambes in les maniques du sac éyé le v’la s’tindue toute plate , il a ée voyageur qui s’t’au fond du car qui wève ée carreau pou donner d’l’aération, i s’fée ée courant d’air, éyé l’bèche que Margot a mau louyé à l’intour de li, s’invole…D’siré pus honteux qu’ée voleur fée chanance de rié)

 (Il a n’femm’ qui dit.)

L’femm’ : Monsieur vous ne ramassez pas votre femme ?

D’siré : Qu’ée femm’…de n’ counnoi nié s’ dgeins là !

(Margot braie comme enn’Madeleine)

Fin.