D’SIRE EYE MARGUERITE

 

                                       Les fiètes

 

Margot : Les fiètes de fègn’ d’année vont arriver éyé de m’demande çou que d’va cô fait pou mingé, matante Gertrude vié mingé à l’noée avé Omer.

 

D’siré : Mi v’là que de r’vié de l’clinique éyé de su tout à gambes de vieau, i m’faut du consistant à mingé !

 

Margot : L’docteur a dit que tu d’vos mingé du lidgére…pour nous autes de va fait des huites du canard à l’orange, des cailles avé des champignons des bois comme on dit devins les grands restaurants éyé pour ti sa sara ée p’tit blanc d’poulet avé n’jatte de porée d’bette.

 

D’siré : De qué ?! Pour mi t’as quéyu su t’tiète in stant djaune …tu caches à m’fait morie comme t’es là !

 

Margot : L’docteur a dit…

 

D’siré : Du lidgére e l’se bié,tu me l’a d’jà dit..au réveillon m’in dirai vire à l’ maison du fameux docteur vire si i minge de l’porée d’bette.

 

Margot : Comme apéritif du champagne, du blanc vègne, du rouge vègne de 1968 éyé pou l’trau ormand enn’ bonne goutte ! C’est damâge D’siré que tu péx pus boire.

 

D’siré : Commint de péx nié boire, mais que c’que t’péx cô fait d’abord…hein…réspons me Margot, tu véx que de mettisse enn’corde à m’goyé tout d’suite, c’est çoulà qui t’faus…

 

Margot : N’in fait nié n’ pareil maitnant, les fiétes vont iète wastées.

 

D’siré : C’est tout c’que t’ as à m’résponde, a be me v’là prope, de n’péx pus boire ni mingé éyé m’fèmm’ emm’ dit d’attinde que les fiétes seusent passées pou mette enn’ corde à m’goyé !

 

Margot : Arrètes de dire des bièstries D’sré éyé de va fait étou des p’tits toasts avec du caviar.

 

D’siré : Du caviar ! C’in bon pou c’que d’ai.

 

Margot : Rié du tout çà n’ai nié bon pou t’coléstebrol éyé e t’ diamète.

 

D’siré : D’abord i n’a pus rié d’bon pour mi , qu’ée malheur !

 

Margot : Mais dire que tu roustètes toudis éyé tu n’arrètes nié de chiquié, t’as cô mingé deux auffes hier à six heures au nuite.

 

D’siré : Hier à six heures au nuite éy il est quatre heures de l’après déner éyé de n’ai nié cô mingé ée morcheau d’ai m’éstoumaque ouvri comme ée harmonica.

 

Margot : Tu fais régime c’est normal, tu n’as qu’à printe enn’ biscotte sans sée !

 

D’siré : Avé çoulà de va iète cras, tu n’as nié d’cœur Marguerite.

 

Margot : Commint de n’ai nié d’cœur, mi qui fait régime in même temps qu’ti pou nié t’fais languie.

 

D’siré : Oui mais tu n’ maigris nié, tandis que mi d’ai m’pance qui colle à m’dos.

De m’in va fumer enn’ cigarette devins l’ véranda.

 

Margot : Tu n’pex pus fumer !

 

D’siré : Va t’in au diâpe ! (I wide)

 

(On sounne à l’porte)

 

Margot : Intrez…( C’est Gerdrude)

Bondjoue matante.

 

Gertrude : Na, d’ai les commissions que vou m’avez iwuiyé quéer au grand boutique…ravisez…tois paquets de biscottes sans sée pou D’siré et alors enn’ côte à l’os d’ée kilo sept cint céquante pour vou souper audjerd’hui Marguerite.

 

Margot : N’criez nié si fort matante pou que D’siré n’intindisse nié, de va me l’vée pindant l’nuite pou mingé m’viande.

 

 

                                                                              FIN